എന്‍റെ - ഫേസ്ബുക്ക്‌ - വട്ടു ചിന്തകള്‍

ഫേസ്ബുക്ക്‌

അതി വിചിത്രമായ ഒരു നാല്‍ക്കവല തന്നെ !!
ചിലരിവിടെ എന്തിനോ വേണ്ടി,

ആര്‍ക്കോവേണ്ടി കാത്തുനില്‍ക്കും 

പാതിരാവോളം.

പിന്നെ തീവ്രനിരാശയാല്‍ തിരിച്ചു പോകും;

നാളെ

വീണ്ടും വന്നു കാത്തിരിക്കാന്‍.

മറ്റു ചിലരുണ്ട്
ഫോട്ടോഷോപ്പിനാല്‍ ദ്രംഷ്ടകള്‍
ചെത്തി മിനുക്കി ചിരിച്ചു കൊണ്ട്
മൃദുവായ് മതം പറഞ്ഞ്
തീവ്രതയെന്ന വിഷദംശനമേകാന്‍.
കൂട്ടത്തില്‍ വേറെയും ഒരുപാടുപേര്‍
വന്ന് നില്‍ക്കും ഈ കവലയില്‍
ബോഡി വേസ്റ്റും , വിശ്വാസങ്ങളുമൊക്കെ
ആകര്‍ഷകമായ പൊതികളിലാക്കി
വില്‍ക്കാനും, വിലപേശാനും.

വേറെയും ചിലര്‍ മറഞ്ഞിരിപ്പുണ്ട്,
കവല മുഴുവന്‍ ഞാന്നാടി
വലയുടെ വിസ്താരം നാള്‍ക്കുനാള്‍ കൂട്ടി
ചിലന്തിയെപ്പോലെ ചുറ്റിവരിഞ്ഞ്
അബലകളെ വീഴ്ത്താന്‍,
ബന്ധങ്ങള്‍ ശിഥിലമാക്കി കണ്ണീരു വീഴ്ത്താന്‍.

ഇനിയും ചിലര്‍
പ്രണയത്തിന്‍റെ താഴ്വരയില്‍
പണ്ടെന്നോ അപ്രത്യക്ഷനായ
പ്രിയനിതിലേ വരുമൊരുനാളെന്നു കരുതി
പച്ച വിളക്കും കത്തിച്ചു പിടിച്ച്
കണ്ണില്‍ വിരഹത്തിന്റെ എണ്ണയും ഒഴിച്ച്.

പോയ്പ്പോയ സൌഹൃദങ്ങള്‍ പൊടിതട്ടിയെടുത്ത്

വിളക്കുകാലില്‍ ചാരി ഓര്‍മ്മകള്‍ അയവിറക്കുന്നവര്‍

ഒരുപാടുണ്ടീ കവലയില്‍ ദ്രുത കാഴ്ചയില്‍ പെടാതെ. 

ഇതിലൊന്നും ശ്രദ്ധിക്കാതെ രാഷ്ട്രീയം പറഞ്ഞ്
നേരില്‍ കാണാതെ തമ്മില്‍ തല്ലുന്ന ചിലര്‍,
ഇഷ്ട താരങ്ങളുടെ അപ്പ്‌ഡേഷനുകള്‍ നോക്കി
ആവേശ തിരയിളക്കുന്നവര്‍,
ആരാധിച്ചാരാധിച്ച് നേരം കളയുന്നു.

കവലയിലെ ചായക്കടച്ചുമരിലെ
സിനിമാ പോസ്റ്ററു നോക്കുന്നപോലെ
പ്രശസ്ത സ്റ്റാറ്റസ് പുണ്യാളരുടെ
വാളുകള്‍ തോറും ചിലര്‍
ലൈക്കുകളും കമെന്റുകളുമായി
മത്സരിച്ച്.

ചിലര്‍ സ്ത്രീകളെ നന്നാക്കാനും,
വസ്ത്രധാരണം പഠിപ്പിക്കാനുമായി,
സ്വന്തം നേരം മെനക്കെടുത്തുമ്പോള്‍
സ്ത്രീകള്‍ അവരെ നോക്കി അടക്കി ചിരിക്കുന്നു.
ഈ മൊണ്ണകള്‍ക്കൊന്നും ഇനിയും
നേരം വെളുത്തില്ലേ എന്നോര്‍ത്ത്.

കറികള്‍ വച്ചും അടുക്കള കഥപറഞ്ഞും
വാളുകളില്‍ നിന്നു വാളുകളില്‍ പോയി
സ്ത്രീകള്‍ കലപില കൂട്ടുമ്പോള്‍
കറിയാണോ കലക്ക വെള്ളമാണോ എന്ന് തിട്ടമില്ലാത്ത
എന്തോ ചേരുവകളില്‍ കുത്തി
കുബ്ബൂസ് തിന്നുന്ന പ്രവാസി,
തന്നുടെ നൊമ്പരം പറയുന്നത് കണ്ട്
കണ്ണീര്‍ തൂവുന്നത് പ്രവാസം അറിഞ്ഞവര്‍ മാത്രം,
അവരുടെ പ്രവാസത്തിന്‍റെ ഗുണഭോക്താക്കള്‍
ഇതെല്ലാം കണ്ടിട്ടും കണ്ടില്ലെന്നു നടിച്ച്.

ചിലര്‍ കൈനീട്ടും മുന്നില്‍ വന്ന്,
അവര്‍ക്കുവേണ്ടിയല്ല; വേദനിക്കുന്ന
ഏതോ ഒരു കുടുംബത്തിനുവേണ്ടി.
അതുകണ്ടാല്‍ പലരും മുഖം തിരിക്കും
എന്നിട്ട് വരട്ടു തത്വ ശാസ്ത്രങ്ങള്‍ പ്രസംഗിക്കും,
സോമാലിയയിലെ പട്ടിണിയും
അറബി നാട്ടിലെ ഭക്ഷണ ധൂര്‍ത്തും പറഞ്ഞു വിലപിക്കും.

ഭൂഗോളത്തിന്റെ അങ്ങേ തലയ്ക്കല്‍ ഇരുട്ടും
ഇങ്ങേ തലയ്ക്കല്‍ പകലുമാകുമ്പോഴും
ഇവരെല്ലാം ആളൊഴിയാത്ത ഈ
കവലയില്‍ തന്നെ തിക്കിത്തിരക്കുന്നു !

 
ഇതിലൊന്നും പെടാതെ
ആരെന്നും എന്തെന്നും അറിയാതെ,
പറയാതെ ചിലര്‍ .
ആ കൂട്ടത്തിലാണോ അല്ലയോ
എന്നറിയില്ലെങ്കിലും ഞാനും നോക്കുന്നു
എനിക്ക് കിട്ടിയ ലൈക്‌ എത്ര ,
കമെന്റ്സ് എത്ര. !!

Photo Courtesy: drshahidzor.blogspot.com & FB. (edited by myself)